Nëse pranohet ndarja e veriut, Serbia të nesërmen e njeh Kosovën!

Lirim Graiçevci, këshilltar politik i kryeministrit Thaçi dhe një nga anëtarët e ekipit të Edita Tahirit që marr pjesë në bisedimet me palën serbe në Bruksel, ka thënë të martën për TV Klan se Borislav Stafanovic, shefi i ekipit serb të bisedimeve, ka kohë që nuk e fsheh pretendimin serb për ndarjen e veriut të Kosovës, përkatësisht që kufiri ndërmjet Kosovës dhe Serbisë të jetë lumi Ibër.

Graiçevci tha se Stefanovic, nëpër korridoret e ambienteve të bisedimeve në Bruksel, vazhdimisht është duke e përsëritur se “nëse Kosova pranon ndarjen e veriut, që të nesërmen Serbia do ta njoh Kosovën”.

Madje Graiçevci ka thënë se këtë pretendim Stefanovic ia ka thënë edhe atij, por jashtë tavolinës së bisedimeve, ndërkaq, në tavolinën zyrtare të bisedimeve ai nuk e ka paraqit asnjëherë deri më tash një kërkesë të tillë.

Autoritetet e Kosovës vazhdimisht e kanë hedhur poshtë mundësinë e ndarjes së Kosovës, edhe pse jozyrtarisht është përfolur mundësia për shkëmbim territoresh – pra që në këmbim të komunave të veriut të Kosovës të banuara kryesisht me serbë, Leposaviqit, Zveçanit dhe Zubin Potokut, Kosovës t’i bashkëngjiten komunat e populluara me shqiptarë që ndodhen në jug të Serbisë, Presheva, Bujanoci dhe Medvegja. /Koha/Telegrafi/