Google pranon ‘vjedhjen’ e e-mailave dhe fjalëkalimeve

Kompania Google për herë të parë ka pranuar se automjetet Street View në mbarë botën rastësisht kanë “mbledhur” më shumë të dhëna personale sesa që ishte raportuar më herët, përfshirë edhe e-mailat e plotë e fjalëkalimet.
Lajmi ka ardhur vetëm disa ditë pasi që agjencia kanadeze për mbrojtjen e të dhënave ka njoftuar se Google ka grumbulluar e-maila të plotë dhe fjalëkalime për çka edhe janë akuzuar për shkelje të drejtave të mijëra kanadezëve.

“Në rast se është shkelur ligji vjen deri tek çështja e fajësisë dhe Google do të duhej të paguaj dënime shumë të mëdha”, ka thënë Marc Rotenberg, drejtor ekzekutiv i Qendrës "Electronic Privacy Information Center" nga Washington.

Agjencitë rregullatore në Francë, Gjermani dhe Spanjë kanë nisur hetimin për shkak të rastit në fjalë.

Mbi 30 prokurorë shteti në Shtetet e Bashkuara të Amerikës janë bërë bashkë dhe kanë nisur hetimin.

Ende nuk është e njohur se sa njerëz janë prekur në këtë rast, raporton agjencia e lajmeve Reuters.

Automjetet e Google për shërbimin Street View rastësisht kanë mbledhur të dhëna nga rrjetet e pambrojtura pa tela të cilat i kanë shfrytëzuar përdoruesit në mbi 30 shtete, kanë raportuar në maj të këtij viti.

Megjithatë, këto ditë ata kanë pranuar se të dhënat e grumbulluara kanë përfshirë edhe e-maila të plotë dhe URL, si dhe fjalëkalimet.

Zëdhënësi i kompanisë ka thënë se të dhënat janë fshirë në shtetet ku agjencitë u kanë dhënë leje për to.