AKR ka refuzuar bashkëqeverisjen me PDK

Kryetari i Aleancës Kosova e Re, Behgjet Pacolli

Kur ka filluar kriza institucionale, kemi pasur ofertë për postin e presidentit dhe të zëmë vendet e LDK-së në Qeveri, ka deklaruar kryetari i Aleancës Kosova e Re (AKR) Behgjet Pacolli. Ai ka thënë se si gjithmonë prej formimit të saj deri më tani, nuk ka qenë pjesë e lojërave, as politike, as përçarëse, as fyese në rrafshin politik të Kosovës.
Pacolli hodhi poshtë pretendimet se me ngritjen e mocionit të mosbesimit ndaj Qeverisë nga AKR-ja, e që pasoi edhe me shpërndarjen e Parlamentit, të jetë bërë për të favorizuar Partinë Demokratike të Kosovës.

“AKR-ja e ka mbështetur Qeverinë e Kosovës në çdo rrafsh, në çdo nismë të saj, por AKR-ja gjithmonë ka kritikuar, e ka ngritur zërin kundër dukurive që ne mendonim se nuk janë të mira dhe i kryente Qeveria”, ka thënë Pacolli në një intervistë për Radion Evropa e Lirë.

“Ne kishim një Qeveri që ishte jofunksionale dhe vetë fakti se Qeveria është jofunksionale, vetë fakti se ne kërkonim dorëheqjen e Qeverisë, thotë shumë edhe për mosfunksionalizimin e kësaj Qeverie dhe mocioni u votua dhe atë unanimisht. Dikush mund të thotë se ne i kemi bërë dikujt favor. Unë nuk di kujt i kemi bërë favor, pos qytetarit të Kosovës".

“Të them të drejtën, kur ka filluar kriza qeveritare, gjegjësisht kur është tërhequr presidenti i Kosovës, ne kemi qenë të parët që kemi pasur ofertë që ne të ofrojmë atë çka mund të ofrojmë - ministrat tanë, që t’ia nisim punës dhe, normalisht, edhe propozimi im të hidhet në Parlament për president të Kosovës”.

“Unë këtë e kam marrë si joserioze, pasi që e dini mirë, se AKR-ja, gjegjësisht unë, nuk kam nevojë për kurrfarë peshqeshi, gjegjësisht diçka që jepet falas dhe unë kam dashur që një post të tillë shumë me rëndësi ta fitoj nga vota e qytetarit dhe jo nga dikush tjetër”.