Krasniqi: Marsi i’99-es nuk do të ndodhte pa marsin e `98-es

Gllogjan, 24 mars - Populli i Kosovës dhe luftëtarët e UÇK-së luftuan për të lënë prapa robërinë, vuajtjet, burgjet që e përcollën popullin tonë, u tha në 13-vjetorin e shënimit të Epopesë së Ushtrisë Çlirimtare të Kosovës në Zonën e Dukagjinit dhe 12-vjetorit të fillimit të bombardimeve të NATO-s kundër caqeve serbe.
Nën përkujdesjen e Komunës së Deçanit, të enjten në Gllogjan u mbajt manifestimi madhështor në përkujtim të 13-vjetorit të Epopesë së lavdishme të UÇK-së në Dukagjin dhe 12-vjetorit të ndërhyrjes ushtarake të NATO-s.
Në këtë manifestim morën pjesë përfaqësues të institucioneve, partive politike, shoqatave të dala nga lufta e UÇK-së, familjeve të dëshmorëve dhe mijëra qytetarë.
Kryetari i Kuvendit të Kosovës, Jakup Krasniqi, ka thënë se populli i Kosovës dhe luftëtarët e UÇK-së luftuan për të lënë prapa robërinë, vuajtjet, burgjet që e përcollën shumë kohë popullin tonë, raporton Kosovapress.
"Duke parë këto dy ngjarje në dukje të parë i duken si koincidencë, por në fakt marsi i 1999 i NATO-s nuk do të ndodhte pa marsin e `98-së së shqiptarëve", ka thënë ai.
Nënkryetari i AAK-së, Blerim Shala, ka thënë se jemi mbledhur për të dëshmuar se nuk është harruar lufta e madhe e marsit.
Kuvendi Komunal i Deçanit nderoi me çmimin "Qytetar nderi" dhe me dekoratën "Shkëlzen Haradinaj" ambasadorin e Norvegjisë në Prishtinë, Sverre Johan Kvale.
Gjatë ditës qytetarë të shumtë kanë bërë homazhe në Kompleksin Memorial në Gllogjan.
Në përvjetorin e Epopesë së Gllogjanit, sot, ministri i MFSK-së, Agim Çeku së bashku me zv. Komandantin e FSK-së, gjeneralmajor Rrahman Rama dhe oficerë të lartë të FSK-së, vizituan Varrezat e Dëshmorëve në Gllogjan, ku vendosën kurora me lule dhe nderuan dëshmorët e Kombit. Delegacioni i FSK-së, me këtë rast, vizitoi edhe Familjen Haradinaj.