Kërkohet ligj për kontrollin e cilësisë dhe sasisë së bukës

Në Kosovë ende nuk ka kontroll për cilësinë dhe peshën e bukës. Zyrtarë të Shoqatës së Furrtarëve, kërkojnë nga Kuvendi i Kosovës që të miratohet Ligji për Mbikëqyrjen e Cilësisë dhe Sasisë së Bukës.
Gatimi i bukës, për çudi, nuk ka asnjë kontroll nga institucionet kompetente. Furrtari, Halit Xoxa, njëherësh, drejtues i Shoqatës së Furrtarëve të Kosovës, tha se buka, thjesht, gatuhet sipas dëshirës se furrtarëve.

“Mungon kontroll e inspektorëve sanitare. Rregullore të shkruara, të hartuara në Kosovë nga organet kompetente për peshën, formën, cilësinë e për përmbajtjen e bukës në Kosovë nuk ka. Te furrtarët dominon prodhimi i bukës 500 gram, quhet buka popullore dhe për përbërjen e saj gati se nuk jepë përgjegjësi askush”, thotë Xoxa.

Megjithatë, Xoxa mendon se një bukë në Kosovë nuk peshon më shumë se 450 gram, edhe pse thuhet se buka peshon 500 gram. “Buka mbetet e zbrazët për arsye se u hidhet më shumë aditiv apo tharm që ajo të rritet, ndërsa kur hidhet në peshore duket se nuk është 500 gramshe, por rreth 450 gram e shitet si 500 gramshe”, thekson ai .

Adem Arifaj, nga Ministria e Bujqësisë thotë se akoma Kosova nuk ka ligj për kontrollin e cilësisë se bukës.

“Normalisht, Ministrisë së Bujqësisë i takon që ta ketë atë kompetencë, për arsye se prodhimet bujqësore i takojnë kësaj Ministrie. Duhet që të hartohet ligji në bashkëpunim me ministritë të tjera, që në vendet tjera e kanë. E ne ende për momentin nuk e kemi një ligj të tillë”, thotë Arifaj.

Shoqata e Furrtarëve të Kosovës kërkon në mënyrë kategorike që Kuvendi i Kosovës të nxjerr ligjin për rregullimin e cilësisë, sasisë dhe specifikave të tjera të bukës. /RTK/Telegrafi/