Targat serbe do të konfiskohen

Derisa këto dy ditët e fundit ka rinisur vendosja masive e targave të reja të Serbisë në veri të Mitrovicës, drejtori i përgjithshëm i Policisë së Kosovës, Reshat Maliqi ka theksuar se policia do të vazhdoj të ndalon çfarëdo iniciative e veprimi që është në kundërshtim me ligjet e Republikës së Kosovës, e në këtë rast do të bëhet edhe konfiskimi i targave serbe ashtu sikur e parasheh vendimi i mëparshëm i ministrit të Punëve të Brendshme, Bajram Rexhepi.
“Ekziston një urdhër nga ana e ministrit të Punëve të Brendshme, Bajram Rexhepi që nëse qytetarët e Kosovës të nacionalitetit serb hasen me targa të cilat ka filluar t’i lëshoj Qeveria e Serbisë, ato duhet të konfiskohen. Ai urdhër është valid dhe ai urdhër nga ne do të implementohet edhe në të ardhmen”, ka thënë Maliqi, duke shtuar se ata që kanë këto tabela serbe, do të ballafaqohen me probleme në momentin kur hasen nga Policia e Kosovës, sepse nuk lejohet që ato tabela të jenë valide në territorin e Kosovës.

Shefi i Policisë së Kosovës u ka bërë më dije të gjithë atyre që mendojnë të veprojnë në kundërshtim me ligjet e Republikës së Kosovës se do të përballen fuqishëm me forcat e rendit. Sipas tij, edhe pse në pjesën veriore përgjegjësi më të madhe ka misioni EULEX, në rastet kur rrezikohet jeta e qytetarëve njësitet e Policisë së Kosovës reagojnë pa leje të askujt dhe do të ndalojnë veprimet kriminale.

Ndryshe pas një urdhri të lëshuar nga i ashtuquajturi kryetar i Qarkut të Mitrovicës, Radenko Nedelkoviq, dje janë vendosur në mënyrë masive targa të reja të Serbisë, nëpër automjete të ndryshme në pjesën veriore të vendit.

Në fund të muajit shkurt dhe në fillim të marsit, mbi 180 serbë të Kosovës kanë pajisur automjetet e tyre me targa të reja të Serbisë, ndërkohë që Ministri i Punëve të Brendshme, Bajram Rexhepi, pati lëshuar një urdhër për konfiskimin e këtyre targave. /Zëri/Telegrafi