Hyrja e Serbisë në BE duhet kushtëzuar me njohjen e Kosovës

Një delegacion parlamentar nga Holanda i kryesuar nga kryetarja e Komisionit Parlamentar për Çështje Evropiane, Gerda Verburg, është pritur të martën në Prishtinë nga Komisioni Parlamentar për Punë të Jashtme i Republikës së Kosovës. Në këtë takim u tha se pavarësia e Kosovës është kompromis nacional i shqiptarëve, prandaj ndarja nuk vjen në konsiderim, sepse do të prodhonte konflikte të reja në Ballkan.

Kryetari i Komisionit Parlamentar për Punë të Jashtme, Albin Kurti, e ka falënderuar shtetin mik të Holandës për gjithë mbështetjen dhënë Kosovës gjatë luftës e sidomos pas shpalljes së pavarësisë së vendit. Ai ka folur për njohjet ndërkombëtare për Kosovën dhe për vullnetin e përgjithshëm në vend për shtimin e këtyre njohjeve dhe afirmimin ndërkombëtar.

Kurti ka kërkuar nga delegacioni holandez që të kushtëzohet anëtarësimi i Serbisë në Bashkimin Evropian me njohjen e Kosovës dhe me kërkim falje për krimet e bëra në Kosovë e gjithandej territoreve të ish-Jugosllavisë.

Kurti në vazhdim ka folur për sfidat e Kosovës, sidomos për sa i përket zhvillimit ekonomik të vendit, obstruksioneve të Beogradit ndaj sovranitetit dhe integritetit të Kosovës, si dhe për misionin e EULEX-it, të cilin e ka vlerësuar të pasuksesshëm, madje edhe të dëmshëm për zhvillimin e Kosovës. Ai ka kërkuar që qëndrimet e Bashkimit Evropian të kalojnë nga paradigma për stabilitet të rajonit tek zhvillimi i përshpejtuar i Kosovës.

Duke iu përgjigjur pyetjes për mundësinë e ndarjes së Kosovës a të bashkimin e saj me Shqipërinë, nënkryetari i Kuvendit, Sabri Hamiti, është shprehur se pavarësia e Kosovës është kompromis nacional i shqiptarëve dhe se për ndarje as që bëhet fjalë, sepse jo prodhon konflikte të reja në Ballkan. “Nëse Evropa dëshiron t’i rregullojë kufijtë etnikë në Ballkan, shqiptarët nuk humbin gjë por fitojnë”, ka theksuar Hamiti. /Telegrafi/