Strategjia e dështimit nga Qeveria e Hashimit!

Strategjia e qeverisë së Kosovës për veriun, përfundoi në një raport, i cili veç se e konstaton gjendjen faktike në këtë pjesë të Kosovës dhe vërteton edhe një here se nuk ka qenë kurrë strategji.
Nese gjatë gjithë kohës Qeveria e Kosovës është lavdëruar verbërisht për përmirësimin e gjendjes në veri, në këtë raport që vjen nga Zyra e Koordinatorit të Strategjisë për veriun, dominon një çasje pranuese për ekzistencën dhe forcimin e vazhdueshëm të Serbisë në veri të Kosovës.
Pafuqia e Qeverisë së Kosovës që të shtrijë sovranitetin në tërë territorin e Kosovës na ka sjellë në këtë situatë. Qeveria për të fshehur këtë pafuqi përpiloi strategjinë për veriun, me të cilën ka kërkuar kyqjen e faktorëve tjerë për zgjidhjen e problemit të veriut, duke iu dhënë këtyre faktorëve rol prijës.
Që papërgjegjshmëria e qeverisë është e pabesueshme tregon edhe fakti se Qeveria e Kosovës ka pritur që me forcimin e Tadiçit në veri do të forcohen edhe ata. Ndodhi pikërisht e kundërta, institucionet e Kosovës po dobësohen edhe më shumë.
Tani edhe kryetari i Serbisë Tadiç e edhe Qeveria e Serbisë publikisht propagojnë ndarjen e Kosovës e gllabërimin e asaj pjese nga Serbia.
Përderisa Serbia angazhon mijëra persona që të mbrojë ate që nuk i takon, Qeveria e Thaçit ka angazhuar një person me dy asistente për të mbrojtur atë që i takon.
Përderisa Serbia shpenzon 500 milion euro në vit për të njejtin qëllim qeveria heq nga buxheti shpenzimet e zyrës së kordinatorit për veri.
Roli i Zyrës Kordinuese për Strategjinë e Veriut sipas tyre, do të duhej të ishte kordinimi i punës së të gjithë aktorëve relevantë legalë të përfshirë në jetën politike dhe të sigurisë në Kosovë, sic janë ministritë e ndryshme të qeverisë së Kosovës, policia e Kosovës, AIK-u, KFORi, policia e Unmikut, Eulexi, ICO, zyra e BE, donatorë e Ojq të ndryshme me c’rast institucionet kompetente shteterore kan rol prijës. Kjo është vetëm një demagogji e kulluar, duke pasë parasysh faktin se misionet ndërkombëtare janë neutrale ndaj statusit politik të Kosovës dhe rrjedhimisht nuk i japin llogari Qeverisë apo cilës do zyrë të saj.
Objektivat e strategjisë siç janë:
Vendosja e kontrollit të plotë në portat doganore 1 dhe 31
• Funksionalizimi i gjykatës në veri të Mitrovicës
• Formimi i komunës së veriut të Mitrovicës
• Mbajtja e zgjedhjeve edhe në tri komunat e veriut të Kosovës
• Faturimi i energjisë elektrike nga KEK-u
• Mbyllja e administratës së UNMIK-ut
• Margjinalizimi i strukturave paralele
•
kanë dështuar nga e para deri te e fundit.
Raporti tregon për mungesën e strategjisë. Zyra e Koordinatorit të strategjisë për veriun e Kosovës është reflektim i mungesës së institucioneve sovrane. Rrjedhimisht figura prej një palaçoje e Ylber Hysës është pafuqia e Hashim Thaçit si lider politik.
Lëvizja VETËVENDOSJE! ka përkujtuar edhe një herë hapat konkretë të cilët i ka propozuar me kohë për shtrirjen e sovranitetit të vendit në veri e ato janë:
Shpallja e FSK-së ushtri dhe mbrojtja e inegritetit territorial nga kjo ushtri, njësia speciale e policisë së Kosovës të vendoset në një bazë në veri dhe në njësitë e saj të punësohen banorë shqiptarë të veriut, me ç’rast edhe do të zbutej papunësia, revitalizimi i Trepçës i cili do të sillte deri te punësimi i 8000 vetave, si mënyrë e integrimit të të gjitha komuniteteve, kallëzimi penal ndaj strukturave paralele, gjë që në vend të institucioneve Lëvizja VETËVENDOSJE! e ka bërë më 25 nëntor 2009, etj.
Lëvizja VETËVENDOSJE! do të vazhdojë ta luftojë politikisht këtë neglizhencë të institucioneve ndaj një pjese të territorit të Kosovës, deri sa të arrihet sovraniteti i plotë i vendit.