Dita e dredhëzës

Është organizuar manifestimi “Dita e Dredhëzës – Kosova 2011” në
sheshin “Adem Jashari” në Skenderaj. Ministria e Bujqësisë, Pylltarisë
dhe Zhvillimit Rural, Kuvendi Komunal i Skenderajt dhe Iniciativa për
Zhvillimin e Bujqësisë në Kosovë (IADK), për herë të tretë me radhë
organizuan manifestimin “Dita e Dredhëzës”, i cili mëton të festohet
tradicionalisht në të ardhmen.Ministri i Bujqësisë, Blerand
Stavileci, tha se dredhëza është njëra nga kulturat me të cilën ne
mburremi, sepse për herë të parë me prodhimtarinë sezonale ne i
plotësojmë kërkesat e tregut vendor dhe eksportojmë. “Prodhimtaria
sezonale e dredhëzës tashmë për herë të parë i mbulon kërkesat e tregut
vendor dhe kjo na ka shtyre që sektorin e pemëve të imta, përkatësisht
prodhimtarinë e dredhëzës, mjedrës dhe manaferrës ta fusim në kuadër të
programeve për mbështetje financiare gjatë këtij viti”, tha ministri
Stavileci.
Ndërsa, Nënkryetari i Komunës së Skenderajt, Fadil Nura, theksoi se
kjo komunë i ka dyfishuar sipërfaqet e mbjella me kulturën e dredhëzës.
“Në komunën e Skenderajt, nga viti 2008 kemi dyfishim të sipërfaqeve të
mbjella me kulturën e dredhëzës dhe në nivel vendi kemi ndikuar në masë
të konsiderueshme në përmbushjen e nevojave konsumuese”, u shpreh Nura.
Aktualisht në Kosovë janë të mbjella 120 hektarë me Dredhëza kur rendimenti mesatar i tyre sillet prej 7 - 10 tonë për hektarë. /Telegrafi/