Tahiri në dilemë nëse do të dialogojë me Stefanovicin

Zëvendëskryeministrja, Edita Tahiri, njëherësh shefe e
delegacionit për bisedime me Serbinë ka shfaqur dilemën nëse do të
pranojë të ulet në një tavolinë në Bruksel me homologun e saj të
deritashëm në dialogun me Serbinë, Borislav Stefanovic. Shefja
e delegacionit kosovarë në këtë dialog i ka thënë gazetës Koha Ditore
se Stefanovicit i është dëmtuar rëndë kredibiliteti.

“Sa i takon ndërhyrjes që është bërë nga ana e Serbisë... ne mendojmë
se ka qenë një veprim destruktiv dhe për fat të keq, në kuadër të kësaj
politike destruktive, z. Stefanovic ishte pjesë e kësaj veprimtarie të
dhunshme, që për mendimin tim ka dëmtuar shumë kredibilitetin e tij palë
në bisedime”, ka thënë Tahiri.

Zëvendëskryeministrja Tahiri ka dhënë këtë qëndrim pasi ka dëgjuar
kryeministrin Hashim Thaçi tek ka akuzuar zyrtarët serbë për nxitje
vrasjeje e dhune në veri.

Gjatë gjithë javës, prej kur ka nisur aksioni për të vënë nën
kontroll shtetëror pikat doganore 1 dhe 31, zyrtarët serbë, Borislav
Stefanovic dhe Goran Bogdanovic kanë qëndruar në veri.

Këtë qëndrim kryeministri i vendit, Hashim Thaçi e ka quajtur ilegal. /Telegrafi/