Thaçi: As ndarje, as status special për veriun

Kryeministri i vendit, Hashim Thaçi e bëri të qartë qëndrimin e institucioneve të Kosovës lidhur me idetë e përfolura për ndarje ose status special për veriun e Mitrovicës. Ai përsëriti qëndrimin se nuk do të ketë ndarje e as ndonjë status të veçantë brenda territorit të Kosovës për asnjë komunitet.
Në mbledhjen e Qeverisë së Kosovës, Thaçi tha se idetë e përfolura janë tema të kota, dhe se raportimet në media se gjoja se Qeverisë së Kosovës i është dërguar një plan nga ndërkombëtarët për ndarje janë absolutisht të pavërteta.

Gjatë mbledhjes së Qeverisë, kryeministri tha se qëndrimin e institucioneve të Kosovës për veriun e Mitrovicës ia ka shprehur edhe zëvendësndihmës sekretarit amerikan, Philip Reekerhe.

Ai tha se ishte konkludim i përbashkët, se ndërhyrja në veriun e Mitrovicës ka qenë e drejtë dhe ligjore.

Duke folur për idenë e përfshirjes së veriut të Mitrovicës në dialogun Kosovë-Serbi, ai tha se dihet se çka bisedohet, ndërkaq për rregullimin e brendshëm u shpreh se vendosin institucionet e Kosovës dhe jo dikush tjetër.

Kryeministri Thaçi falënderoi shtetet, Guineja Conakry dhe Republikën e Nigerit për njohjen e Kosovës, ndërkohë paralajmëroi se shumë shpejt do të ketë edhe njohje tjera.

Ndryshe, burime të Telegrafit bëjnë të ditur se pas dialogut që pritet të fillojnë në shtator ndërmjet Kosovës e Beogradit, mund të ketë ndërprerje të bisedimeve për shkak të zgjedhjeve në vitin e ardhshëm që priten të mbahen në Serbi. /Telegrafi/