Dacic pranon pavarësinë për gjysmën e Kosovës

Zëvendëskryeministri, njëherësh ministër i Punëve të Brendshme i Serbisë, Ivica Dacic ka deklaruar në Banjallukë se nuk mund të pranojë që e gjithë Kosova të jetë e pavarur.

Sipas tij, nëse ndokush mendon se kjo do të ndodhë, mashtrohet keqas.

“Në këtë kontekst është krejtësisht e parëndësishme se kur do të jenë zgjedhjet, sepse cilado qeveri të jetë në Beograd, nuk do ta njohë Kosovën”, ka thënë Dacic, njofton Tanjug.

Ai ka thënë se zgjidhjen e krizës kosovare e sheh vetëm në dialogun e serbëve dhe të shqiptarëve. “Realiteti duhet të jetë një marrëveshje e serbëve dhe e shqiptarëve, por vija e kuqe për shtetin nën të cilën nuk guxojmë të shkojmë është se nuk guxojmë të lejojmë eksod të serbëve e sulm frontal kundër tyre, sepse këtë Serbia e ka të pamundur ta durojë këtë”, citohet të ketë thënë Dacic.

Marrëveshje të serbëve dhe të shqiptarëve nuk mund të ketë pa ndërmjetësim të institucioneve ndërkombëtare ka thënë Dacic, dhe siç ka shtuar ai, zgjidhjet e deritashme të Prishtinës sjellin sërish konflikt dhe hapin mundësitë që të ndodhin “konflikte të mëdha”.

"Situata në Kosovë nuk mund të zgjasë kaq gjatë. Një pjesë e bashkësisë ndërkombëtare konsideron se konflikti është zgjidhur ashtu që, si mendon ajo, Kosova është e pavarur, e të tjerët që janë në anën tonë konsiderojnë se Kosova është pjesë e Serbisë. Sa është reale njëra dhe tjetra, shikoni në terren”, ka vlerësuar Dacic.

“Serbia duhet të kërkojë zgjidhje përfundimtare të problemit të Kosovës. Çështja kombëtare shqiptare është plagë kanceroze në Ballkan dhe ajo duhet të zgjidhet por jo në dëm të çështjes serbe”, ka thënë Dacic në Banjallukë, me ç’rast ka nënshkruar Memorandumin për përforcim të bashkëpunimit policor ndërmjet Serbisë dhe Republikës Serbe. /Telegrafi/