Persona të armatosur sulmojnë forcat e NATO-s

Persona të armatosur kanë hapur zjarr ndaj një autokolone të NATO-s në kryeqytetin e Pakistanit, Islamabad, duke vrarë shtatë vetë dhe duke i vënë zjarrin një numër kamionësh përpara se të largoheshin.

Policia lokale thotë se dymbëdhjetë persona të armatosur janë përfshirë në këtë sulm, të pajisur me armë automatike dhe granata. Sulmi ndodhi vetëm dhjetë km jashtë Islamabadit dhe korrespondenti i BBC thotë se kjo është hera e parë që një sulm i tillë ndodh kaq pranë kryeqytetit.

Kamionët e NATO-s po transportonin furnizime për trupat e Aleancës në Afganistan.

Kaleem Imam nga Policia e Islamabadit tha se siguria përreth autokolonës nuk kishte qenë e mjaftueshme.

"Ne po hetojmë se cilët persona kanë qenë të përfshirë, si u krye sulmi dhe përse nuk ishte organizuar sigurimi i duhur nga njerëzit që e kryejnë këtë biznes. Nëse ata duan siguri nga ne, ata duhet ta kërkojnë një gjë të tillë”.

“Hetimi ka filluar dhe njerëzit na kanë ofruar informacione. Ne kemi zbuluar një nga makinat e dyshuara. Po ashtu ne jemi vënë në ndjekje të makinës si dhe kemi filluar operacionin e kërkimit. Po ashtu kemi vendosur në gatishmëri Policinë Rrugore, Korpusin e Kufirit dhe forca të tjera policore", tha Kaleem Imam nga Policia e Islamabadit. /BBC/