Twitter arrin 2 miliardë “tweets” në muaj

Drejtori i teknologjisë në Twitter, Dick Costolo thotë se në faqen më të njohur në botë për mikro-blogje, përdoruesit vendosin rreth 65 milion “tweets”, çdo ditë.
Kjo automatikisht nënkupton se në këtë faqe vendosen rreth 2 miliardë “cicërima” brenda një muaji. Llogaritur edhe më saktë, numri i “tweets” për muaj shkon përafërsisht në 1.96 miliardë.
Para një jave ishte raportuar se, Twitter ka arritur shifrën rekorde prej gjithsejtë 15 miliardë “tweets”. Mirëpo, ritmi i rritjes së faqes është marramendës.

Sa për ilustrim, para një muaji faqja kishte arritur në shifrën prej 10 miliardë rifreskime, ndërsa në vjeshtën e vitit të kaluar kjo faqe kishte vetëm 1 miliardë postime në blogje nga përdoruesit e saj. Këto shifra më së miri tregojnë se si po ecën kurba e rritjes së Twitter, brenda një kohe kaq të shkurtër.

Costolo gjithashtu ka thënë se çdo ditë, në faqe regjistrohen më shumë se 135 mijë përdorues të rinj, mirëpo ende nuk dihet nëse ky numër i llogarive të reja mbetet aktiv, apo mbyllet pas një kohe të shkurtër.