AKR i dëshiron mirëseardhje Vetëvendosjes në politikë

Organet e Drejtësisë së Kosovës kanë dëshmuar edhe një herë se kanë nevojë për reforma të thella të sistemit që kanë ndërtuar. Ato me mungesën përgjegjësisë dhe profesionalizmit që kanë treguar, kanë bërë që çështja Kurti, të komplikohet deri në këtë masë sa të kemi skena të tilla çfarë e kemi parë këto ditë- thuhet në një reagim të AKR-së me rastin e arrestimit të Albin Kurtit.
“AKR beson se Albin Kurti do të dëshmojë për pafajësinë e tij, përballë akuzave që i behën, për t’i dhënë fund kështu kësaj çështje të tejzgjatur dhe të ndërlikuar”, thuhet në reagim, ndërsa bëhet e qartë se AKR nuk do të paragjykojë vendimin përfundimtar të organeve të drejtësisë, prandaj ky subjekt politik kërkon fuqishëm që ky rast të zgjidhet pa ndikime politike, duke besuar se drejtësia do të dalë shumë shpejtë me vendim për këtë çështje, për të zbardhur edhe rastin e 10 shkurtit 2007.

Aleanca Kosova e Re që tani i ka dëshiruar mirëseardhje në skenën politike në Kosovë “Lëvizjes Politike Vetëvendosje”.

“Kosova është vend demokratik, me një sistem shumë partiak dhe hyrja në politikë e kësaj Lëvizje e pasuron skenën politike në Kosovë. Kosova ka nevojë më se kurrë për aktivizimi e njerëzve të denjët dhe të sinqertë në skenën politike dhe qytetarët e Kosovës tashmë do të kenë një alternativë më shumë”, thuhet në fund të reagimit.