Tali e Rrustemi ende të pavendosur

Prishtinë, 4 nëntor - Derisa data e zgjedhjeve të jashtëzakonshme po afrohet, ish- deputetët e pavarur Driton Tali e Naim Rrustemi janë në dilemë nëse do t’i bashkohen ndonjë subjekti politik, apo të tërhiqen nga politika.

Driton Tali thotë se e ka problem të kyçet në subjektet e mëdha politike për faktin se aty ka edhe njerëz të korruptuar, kurse Naim Rrustemi mbetet në mes të tërheqjes dhe bashkimit me ndonjë subjekt politik.

Duke e kritikuar miratimin e pragut prej 5 për qind për hyrje në parlament, Tali ka thënë se legjislatura e radhës mund të jetë një teatër kukullash. Ndërkohë Naim Rrustemi thotë se pragu i lartë zgjedhor ka të vetmin qëllim që partitë e mëdha të jenë pikë grumbulluese e partive të vogla.