Kthehemi pa Sejdiun kryetar

Astrit Haraqija
I vetmi shans që Lidhja Demokratike e Kosovës (LDK) të hyjë e bashkuar në zgjedhje është që Ukë Rugova të jetë bartës i listës..., ndërsa Isa Mustafa të jetë një kryesues i Kryesisë teknike, ka deklaruar Astrit Haraqija, njëri nga udhëheqësit e fraksionit të LDK-së, që mban emrin e ish presidentit të ndjerë dhe themeluesit të LDK-së, Ibrahim Rugova.
I pyetur se çfarë po ndodh me fraksionin, derisa Kryesia e LDK-së po cakton agjendën e Kuvendit Zgjedhor që do të mbahet të dielën, Haraqija ka përsëritur se Lista “Dr. Ibrahim Rugova” do ta bëjë të premten regjistrimin; ose Uka duhet të jetë bartës i listës, flamuri i Dardanisë duhet të jetë flamur presidencial, ndërsa himn “Kur ka ra kushtrimi...”, pa Fatmir Sejdiun kryetar.

“Unë kam kërkuar që të jetë Isa Mustafa, por jo të jetë kryetar i LDK-së, por të jetë një kryesues i Kryesisë teknike, për arsye se këto zgjedhje që janë mbajtur, janë mbajtur tmerrshëm, jashtëzakonisht keq dhe nuk kemi marrë pjesë në këto zgjedhje fare”.

I pyetur se a do ta braktisë fraksioni i tij LDK-në, Haraqija tha për Radio Evropa e Lirë se “ne jemi LDK, po në një LDK që i mban zgjedhjet me rregull, fer dhe në mënyrë demokratike, jo me një LDK të manipuluar. Ne mbetemi LDK”.

Ndërsa i pyetur se a do të kryesohet nga Ukë Rugova, apo nga Bujar Bukoshi lista e cila do të paraqitet të premten, ish-ministri i Kulturës, Haraqija, është përgjigjur se “kjo punë as që negociohet - Ukë Rugova kryeson Listën”.