Rend e ligj edhe në veri

Shefi i EULEX-it, Xavier de Marnhac
Shqiptarët dhe serbët duhet të bisedojnë me njëri-tjetrin në prani të prezencës ndërkombëtare, ka thënë të premten gjatë vizitës në veri të Mitrovicës, shefi i EULEX-it, Xavier de Marnhac. Sipas tij, qëllimi është të shtohet fizibiliteti dhe prezenca e EULEX-it në mbarë territorin, duke përfshirë këtu edhe veriun.
“Tani kam një botëkuptim më të qartë për zhvillimet këtu. Po ecet me hapa të ngadaltë, por të sigurt, dhe ne do të shtojmë prezencën dhe aktivitetet tona në tërë Kosovën, përfshirë edhe veriun”, tha Marnhac, pasi kishte kaluar natën në pjesën veriore të qytetit. Ai ka thënë se ka pasur kontakte me përfaqësues të ndryshëm, përfshirë këtu edhe përfaqësuesit e strukturave paralele, me qëllimin e vetëm që është në dobi të Kosovës.

Sa i përket sundimit të ligjit, Marnhac ka theksuar se qëllimi definitiv i EULEX-it është të shtohet përkushtimi kundër krimit të organizuar, kontrabandës, trafikimit ilegal në të dyja anët e lumit, sepse ekziston bashkëpunimi në këtë drejtim nga të dy palët.

“Qëllim imi është që të rris përkushtimin tonë kundër krimit të organizuar dhe trafikimit të paligjshëm në të dyja anët e lumit, sepse jam i vetëdijshëm se ka lidhje në të dyja anët. Mendoj se askush në Kosovë nuk mund të pres përmirësim të dukshëm të gjendjes ekonomike, shtim të vendeve të punës pa një kornizë të mirë ligjore. Misioni i EULEX-it është i vendosur që të rris përkushtimin e tij në fushën e rendit dhe të ligjit”.