Pesë muaj pas asnjë ligj

Ndonëse legjislatura e re e institucioneve të Kosovës – Kuvendi dhe Qeveria, kanë para vetes një plan të ngjeshur legjislativ për vitin në vijim, të dyja këto institucione po shkelin për pak ditë në muajin e gjashtë të vitit dhe veç Ligjit për buxhet, asnjë ligj i ri nuk e ka kaluar leximin e dytë në Kuvend, në mënyrë që të shpallet nga presidenti dhe të jetë bërë publik në Gazetën Zyrtare të Kosovës.
Kjo vonesë e gjatë është duke u planifikuar që të shkurtohet nëpërmjet përshpejtimit të procedurës së shqyrtimit nëpërmjet leximit të parë dhe të dytë, shkruan Kosova Sot.
Megjithatë, një hap konkret në këtë drejtim ende nuk është bërë. Kuvendi i ka shpeshtuar seancat, duke u mbledhur çdo javë në seancë plenare, por deri më tash ka mbizotëruar kryesisht shqyrtimi i raporteve të agjencive të ndryshme, derisa përveç ligjeve që janë miratuar në parim, leximin e parë, në leximin e dytë nuk është as edhe një ligj i vetëm që pritet të kalojë në Kuvend para qershorit. /Telegrafi/