Në Shkup sot protesta kundër ligjit për regjistrimin e popullsisë

Shkup, 14 nëntor - Në Shkup sot do të mbahet protesta kundër Ligjit për regjistrimin e popullsisë në Maqedoni, i cili ka nxitur shqetësime nga opozita për mundësitë e manipulimit të procesit të regjistrimit të popullsisë dhe diasporës shqiptare. Protesta e organizuar nga Demokracia e Re do të mbahet në orën 14 para Parlamentit të Maqedonisë, një ditë pasi që shumica pritet të votojë ligjin e propozuar nga Qeveria e koalicionit VMRO-DPMNE dhe BDI. Protesta deri tani është mbështetur nga disa subjekte politike, shoqata joqeveritare, personalitete politike dhe shoqërore dhe nga organizatat e ndryshme shqiptare në diasporë. Zëdhënësi i DR-së, Arianit Hoxha, apeloi që të gjithë shqiptarët pavarësisht bindjeve të tyre partiake, të dalin në mënyrë masive në protestën e nesërme. “Bëjmë thirrje publike deri te të gjithë vëllezërit dhe motrat tona shqiptare që të na bashkëngjiten që qetë, me dinjitet dhe krenari të protestojmë kundër miratimit të Ligjit për regjistrimin e popullsisë që përjashton 30-40 për qind të shqiptarëve në regjistrimin e vitit të ardhshëm”, theksoi për agjencinë e lajmeve INA, Arianit Hoxha. Protesta do të mbahet me moton “Nuk regjistrohesh, nuk ekziston”