Basha pranë transferimit në Cagliari

Cagliari, 8 janar - Mesfushori kosovar Migjen Basha është afër që t'i bashkohet skuadrës së Serie A të Italisë, Cagliari, shkruan "calcioitaliaweb.com" të premten. Basha aktualisht është duke luajtur për skuadrën e Atalantas në Serie B. Për shërbimet e mesfushorit kosovar kanë treguar interesim edhe Chievo e Torino.
"Cagliari pritet që së shpejti të zyrtarizojë transferimin e parë të afatit kalimtar të janarit. Ai do të jetë mesfushori Migjen Basha", bën të ditur "calcioitaliaweb.com".
Basha 24-vjeçar me Atalantan këtë stinor është paraqitur në 14 ndeshje në Serie B. Ai ka zhvilluar edhe dy ndeshje në Kupë të Italisë. Basha më herët ishte pjesë e grupmoshave të reja të Zvicrës, ndërsa së fundi është pajisur edhe me pasaportë të Shqipërisë.
Vetë agjenti i Bashës, Sergio Gabarello, nuk ka konfirmuar transferimin e klientit të tij në Cagliari. Madje ai ka thënë se Atalanta nuk mendon ta lëshojë kosovarin, mirëpo nuk ka hedhur poshtë mundësinë që të ndodhë diçka e papritur. Në fakt trajneri i Atalantas nuk ka llogaritur shumë në kosovarin në pjesën e parë të kampionatit.
"Para vetëm disa ditëve kam folur me drejtorin sportiv të Atalantas, Gabriele Zamagna, dhe ai më ka thënë se dëshirojnë të mbajnë Bashën. Ata nuk mendojnë ta shesin Bashën, edhe pse ai ka luajtur pak ndeshje. Për Bashën pos Cagliarit ka treguar interesim edhe Chievo e Torino. Atalanta nuk është e gatshme ta shesë Bashën, mirëpo kurrë nuk i dihet se çfarë mund të ndodhë", ka thënë Gaballero.
Në Serie A aktualisht luajnë Blerim Xhemajli (Palermo), Erjon Bogdani (Cesena), Përparim Hetemaj e Panajot Kone (Brescia) dhe Pajtim Kasami (Palermo).
Pjesë e Cagliarit para tre vjetësh ishte mesfushori kosovar Rijat Shala. Cagliari aktualisht zë pozitën e 15-të në elitën e futbollit italian me 20 pikë të mbledhura nga 18 ndeshje.