Shala këshillon skuadrën: Mos harxhoni, ja ku më keni

Dundee, 11 janar - Sulmuesi Andis Shala ka nxitur bashkëlojtarët e tij të tregojnë karakter të fortë dhe t'u dëshmojnë drejtuesve të Dundee Unitedit se nuk kanë nevojë të shpenzojnë të holla për të zëvendësuar sulmuesin David Goodwillie, shkruan të mërkurën gazeta skoceze "The Courier". Sulmuesi Goodwillie pritet të largohet nga Dundee Unitedi gjatë këtij dimri, pasi po kërkohet nga Glasgow Rangers, Blackpooli, Swansea dhe Kaiserslauterni.
Shala, i cili kohën më të madhe e kalon në bankën rezervë të Dundeet, është i gatshëm të zë një vend titullari te ekipi kur të largohet sulmuesi Goodwillie. Tifozët e Dundeet kërkojnë nga krerët e klubit që të hollat nga shitja e Goodwilliet t'i shpenzojnë në një sulmues tjetër. Mirëpo, Shala 22-vjeçar insiston se blerja e një sulmuesi të ri nuk është e nevojshme.
"E ndiejë se më duhen vetëm disa ndeshje për të ardhur në formën time më të mirë. Nuk duhet të shpenzojmë të holla për sulmues të ri. Ekipi ka treguar karakter deri më tani dhe mund t'ia dalim shumë mirë edhe pa Davidin", u shpreh Shala. "Shpresoj të më jepet rasti nëse Davidi largohet për t'u futur në përbërjen e parë dhe të dëshmojë vlerat e mia. Dua t'i ndihmojë ekipit për të fituar dhe të gjithë do të shohin cilësitë e mia".
Shala në verën e vitit 2008 u pat transferuar te Dundee nga skuadra gjermane Manheim. Ai ka shënuar dy gola në 30 paraqitje dhe largimi i Goodwilliet është rasti i tij i fundit.
"Kontrata më skadon këtë verë. Unë dua të luajë dhe besoj se jo vetëm unë, por edhe sulmuesit tjerë të ekipit janë të gatshëm për të zëvendësuar Goodwillien", tha Shala. "Do të jetë vështirë për të siguruar vendin e titullarit, por unë jam i gatshëm të bëjë të pamundurën në stërvitje".