Vizat, Berisha: Edhe kushtet e mbetura do të plotësohen

Kryeministri, Sali Berisha, reagoi menjëherë pas vendimit të KE-së për liberalizimin e vizave, duke vlerësuar se ky vendim është historik për popullin shqiptar. Ai shtoi se ky liberalizim është premtim i mbajtur i kësaj qeverie.
Në konferencën për shtyp, Berisha tha se qeveria shqiptare është e angazhuar për të plotësuar tre kriteret e kërkuara nga KE-ja.

Kreu i qeverisë tha se po merren masa konkrete në këtë drejtim. “Rekomandimi për forcimit të kapaciteteve në luftë kundër korrupsionit dhe krimit të organizuar, është marrë dhe po merret me seriozitetin më maksimal të kësaj qeverie”, tha Berisha, duke përmendur këtu ngritjen e Taks-Force në këtë drejtim, për të luftuar korrupsionin.

“Taks Forca kundër korrupsionit është gjetja më e mirë pasi grupon specialist të disa fushave në lidhje me këtë luftë”, tha Berisha.

Rekomandimi tjetër, ishte edhe ligji antimafia, që u përmend edhe nga Berisha, duke e cilësuar si një nga ligjet më të mira. “Policia dhe prokuroria ka sekuestruar një sërë asetesh. Shumë shpejt policia dhe prokuroria do të dërgojnë dosjen në gjykatë”, tha kreu i qeverisë. Në këtë linjë, ai shtoi se do të zgjerohet numri i personalit në këto institucione. /gazeta start/