Pacolli mohon t’i jetë kërkuar të tërhiqet

Behgjet Pacolli ka mohuar që kryeministri Hashim Thaçi t’i ketë kërkuar që ai të tërhiqet nga kandidatura e sërishme për president të Kosovës.

“Askush nuk ka kërkuar nga unë që të mos kandidohem”, citon RTK të ketë thënë Pacolli, raporton RTK.

Pacolli ka thënë se gjithçka do të qartësohet të hënën, gjatë takimit që do të zhvillohet ndërmjet PDK-së dhe AKR-së, ku do të bisedohet pikërisht rreth kësaj çështjeje.

Ndërkohë AKR-ja nuk ka ndërruar qëndrim karshi paralajmërimeve të fundit për shkëputje nga koalicioni me PDK-në. Kërkesa kryesore e AKR-së është që PDK-ja të sigurojë votat e mjaftueshme që Behgjet Pacolli të bëhet president i Kosovës. Në të kundërtën, AKR-ja vazhdon të kërcënojë me tërheqje nga koalicioni qeverisës.

Për këtë të fundit, Myzejene Selmani nga AKR-ja ka thënë se kjo parti ka marrë aprovimin e Këshillit Drejtues dhe degët e partisë për të shkëputur kontratën me PDK-në.

“I takon partisë më të madhe në koalicion, PDK-së, të zbatojë në tërësi atë që e kemi nënshkruar, pra zgjedhjen e Pacollit për president”, ka thënë deputetja Selmani.