Zgjedhje, vetëm nëse rrëzohet Qeveria

Dështimi i mundshëm i realizimit të seancës për votimin e presidentit nuk imponon shpalljen e zgjedhjeve të reja pas dy muajsh. Shkak për votim të sërishëm në nivel vendi, në rrethanat e tanishme, mund të bëhet vetëm shkarkimi i Qeverisë.
Një nga hartuesit e Kushtetutës ka thënë për Kohën Ditore se partitë në pushtet nuk kanë të drejtë kur thonë se zgjedhjet duhet të shpallen dy muaj pasi të caktohet seanca për zgjedhjen e presidentit, në rast se gjatë kohe partitë opozitare nuk marrin pjesë në votim për të siguruar kuorumin.

Sipas tij, ky nuk është interpretim i drejtë që i bëhet nenit 82.3. Ky nen thotë se shpërndarja e Kuvendit mund të bëhet ‘nëse brenda afatit prej 6 0 ditësh nga dita e fillimit të procedurës së zgjedhjes nuk zgjidhet presidenti i Republikës së Kosovës.

“Sikur kjo të interpretohej në këtë frymë, atëherë Kuvendi do të duhej të shpërndahej më 22 prill, nëse presidenti nuk zgjidhet deri në këtë datë. Më 22 shkurt ishte thirrur seanca, por për faktin se nuk kishte së paku dy kandidatë për president dhe nuk ishin së paku 80 deputetë në sallë kur u vendos të votohej, kushtet formale për të vënë në lëvizje procedurën e zgjedhjes së presidentit nuk ishin plotësuar. Për këtë shkak sot Pacolli nuk është president”, ka thënë ky ekspert kushtetues.

Bazuar në nenin 82 të Kushtetutës, Kuvendi shpërndahet në këto raste: nëse brenda afatit prej 60 ditësh nga dita e caktimit të mandatarit nga presidenti i Republikës së Kosovës nuk mund të formohet Qeveria, nëse për shpërndarjen e Kuvendit votojnë dy të tretat e të gjithë deputetëve, shpërndarja bëhet me dekret të presidentit të Republikës, nëse brenda prej 60 ditësh nga dita e fillimit të procedurës së zgjedhjes nuk zgjidhet presidenti dhe Kuvendi mund të shpërndahet nga presidenti pas votimit të suksesshëm të mosbesimit të Qeverisë.

Ndryshe, opozita duke vazhduar të qëndrojë në pozicionet e deklaruara më herët se nuk do të jetë në seancën që do të thirret për zgjedhjen e presidentit, në rast se për kandidatin nuk do të ketë konsensus midis pozitës dhe opozitës. /Telegrafi/