Haxhiu padit Florin Krasniqin

Deputeti nga radhët e Partisë Demokratike të Kosovës, Bekim Haxhiu tha të premten në Kuvendin e Kosovës se i jep fund diskutimit me deputetin Florin Krasniqi, duke theksuar se për akuzat dhe shpifjet Krasniqi të ndjekë rrugën ligjore.
Haxhiu kërkoi që Kuvendi në një seancë të ardhshme të distancohet nga aktet e kryera kriminale pas luftës në Kosovë, ndërkohë që kërkesën e tillë tha se do t’ia dorëzojë administratës.

“Duke qenë se përcaktimin ne të zgjedhurit e popullit është mbrojta e ligjshmërisë, pasurisë shtetërore dhe interesit qytetarë, duke qenë se jemi përcaktuar për shtet ligjor veprim institucional dhe krijimin e një shteti mbi baza etike e humane, duke qenë qe e vërteta është sinonim dhe kërkesë e shumicës së popullit tonë unë kam mbledhur 15 nënshkrimet e deputetëve të Kuvendit dhe kam iniciuar hetim ndaj deputetit Florin Krasniqi në organet e drejtësisë në Kosovë dhe SHBA”, ka thënë deputeti Haxhiu.

Ai potencoi se një kopje të këtë inicim hetimor do t’ ia ofrojë edhe Kuvendi jo pse ka për detyrë te hetojë, por sipas tij për të treguar se çfarë personi udhëheqë me një Komision parlamentar. Haxhiu mes tjerash tha se me këtë inicim, i ka dhënë fund debatit me deputetin Krasniqi.

Ndërkaq, deputeti i Aleancës për Ardhmërinë e Kosovës, Burim Ramadani, ka kërkuar zyrtarisht mbështetjen e grupeve parlamentare për krijimin e një komisioni hetimor, i cili do të merrej ekskluzivisht me hulumtimin e veprimtarisë dhjetëvjeçare të Shërbimit Informativ të Kosovës.

Ditë më parë është zhvilluar një debat në Komisionin Parlamentar për Mbikëqyrje të Agjencisë Kosovare për Inteligjencë ndërmjet deputetit të PDK-së, Bekim Haxhiu dhe atij të Vetëvendosjes, Florin Krasniqi.

Deputeti i PDK-së, Bekim Haxhiu, i kishte propozuar Komisionit që të miratojë kërkesën për Kryesinë e Kuvendit të Kosovës për të larguar nga detyra e Kryetarit të Komisionit deputetin e VV-së, Florin Krasniqi, me arsyetimin se ky i fundit ka shkelur konfidencialitetin e Komisionit kur ka akuzuar PDK-në sa i përket funksionimit të “Shërbimit Informativ të Kosovës” (SHIK). /Telegrafi/