Maurer: Ushtarët zviceran do të qëndrojnë edhe më tutje në Kosovë

- Ministri i Mbrojtjes në Qeverinë zvicerane, Ueli Maurer gjatë një
takimi sot në Gjenevë me përfaqësuesit e mediave zvicerane dhe botërore,
duke folur për rolin dhe angazhimin e armatës zvicerane jashtë vendit
ka përmendur edhe Kosovën. Ai tha se me “angazhimin e ushtarëve tanë në
Kosovë dhe në Ballkan ruhet edhe stabiliteti në Zvicër”, raporton
Agjencia “Presheva Jonë” nga Gjeneva.
I pyetur nga “Presheva Jonë”
për situatën në Kosovë dhe misionin e Swisscoy në rajon, ministri
zviceran i Mbrojtjes është përgjigjur se “nuk mendoj se është koha për
tërheqjen e trupave tona nga Kosova për shkak se situata në rajon ende
është fragjile. Por, kjo nuk do të thotë se njëzet vjet ushtarët tanë do
të qëndrojnë atje dhe do të vijë koha që edhe Swisscoy do të tërhiqet
një ditë nga Kosova. Ndryshe, edhe popullata dhe institucionet e Kosovës
duhet të i gëzohen tërheqjes së trupave tona dhe atyre ndërkombëtare,
sepse kjo flet se Kosova është stabile, në rrugë të mbarë dhe ata nuk
kanë nevojë më për ne”.