Bisedimet teknike, drejt raundit të pestë

Çdo marrëveshje e arritur mes Republikës së Serbisë dhe Republikës së Kosovës do të ratifikohet nga Kuvendi, ndërsa garantues do të jetë Bashkimi Evropian, i cili përmes mekanizmave të tij do ta mbikëqyrë zbatimin. Në raundin e katërt të dialogut është shënuar një progres në fushën e lirisë së lëvizjes, tregtisë së lirë dhe energjisë. Madje, thuhet se përparimet në procesin aktual janë substanciale në këto tri çështje, ndërsa ka edhe përafrime edhe në çështje të tjera të hapura. Shefja e delegacionit të Kosovës, zëvendëskryeministrja, Edita Tahiri thotë se kanë dhënë kontributin maksimal dhe një pajtim në parim për draftmarrëveshjen. Pas raundit të katër të dialogut, i cili në gjykimin e zëvendëskryeministres, Tahiri konsiderohet si takim më i suksesshmi, tani janë në një fazë intensive të bisedave trepalëshe me telekonferencë. “Ne tani kemi hyrë në zonën e marrëveshjeve që shpejt do të ndodhin. Ne si palë e Kosovës tashmë kemi dhënë përkrahjen tonë për këto tri çështje propozim-marrëveshje. Presim që edhe pala serbe të vendosë më shpejt, edhe ata kanë dhenë kontribut, por mbase ka nevojë edhe për pak kohë”, tha Tahiri. Liria e lëvizjes së lirë përfshinë lëvizjen e lirë të qytetarëve të të dyja vendeve me dokumente të udhëtimit dhe targa të automjeteve të vendeve përkatëse.

Nga mesi i muajit qershor do të mbahet raundi i pestë i dialogut, ndërsa takimet intensive të telekonferencave do të vazhdojnë, ku edhe grupet e ekspertëve janë duke punuar maksimalisht./ Kosova Sot/