Thaçi i Mustafa shtrëngojnë duart në 10-vjetorin e AKK-së

Liderët e dy partive më të mëdha në vend, që përpos akuzave ndaj
njëri-tjetrit rrallë shihet të kenë komunikim tjetër, sot kanë
shtrënguar duart gjatë një takimi. Kryeministri i Kosovës, Hashim Thaçi e
kryetari i Prishtinës, Isa Mustafa, kanë përshëndetur shkurt
njëri-tjetrin në shënimin e 10-vjetorit të Asociacionit të Komunave të
Kosovës.“Progresi i arritur në Kosovën e pavarur është
sukses edhe i pushtetit lokal” , ka thënë kreu i ekzekutivit Thaçi, duke
shtuar se qeveria që ai udhëheq e sheh si partner AKK-në në zhvillimin e
demokracisë në vend, raporton KTV.
Meqenëse e kishin bojkotuar një takim për t’u folur rreth obligimeve
që kanë drejt integrimit në BE, Thaçi u ka bërë me dije kryetarëve të
komunave se duhet të punojnë edhe më shumë rreth përmbushjes së
kritereve për integrim në BE.
Si e arritur e AKK-së, sipas kryetarit të saj , Bajrush Xhemajli,
është lobimi aktiv për miratimin e legjislacionit që prek kompetencat e
komunave. Ai ka shtuar se AKK është unike dhe nuk përbehet nga pikëpamje
politike, pavarësisht se kryetari zgjidhet nga partia që fiton numrin
më të madh të komunave në zgjedhje lokale.
Asociacioni i Komunave të Kosovës, do të vazhdoj gjatë gjithë javës
aktivitetet e ndryshme, në atë që e kanë quajtur “Java e Komunave”.
/Telegrafi/