Çitaku: Procesi i riatdhesimit nuk është punë e lehtë

Ministrja e Integrimit Evropian, Vlora Çitaku në kuadër të
vizitave në komuna ka vizituar komunën e Malishevës, Junikut dhe Deçanit
për të diskutuar më hollësisht procesin e ri-integrimit të personave të
riatdhesuar dhe qasjes në fondin 3.5 milionë eurosh të alokuar nga
Qeveria e Kosovës, për ndihmë komunave në procesin e ri-integrimit të
personave të riatdhesuar. Në takimin me kryetarin e komunës
së Junikut, Agron Kuçi, ministrja Çitaku tha se nuk ka kohë për të
humbur dhe se agjenda evropiane dhe integrimi në Bashkimin Evropian
është qëllimi i të gjithëve në Kosovë.
Të dy palët u pajtuan se është e domosdoshme që të ketë koordinim sa
më të madh në këtë aspekt, në mënyrë që i gjithë procesi të shkojë sa më
lehtë dhe t’i kontribuojë përmirësimit të jetës së qytetarëve të
Kosovës.
Edhe në vizitën në komunën e Deçanit, me kryetarin e komunës, Rasim
Selmanaj, Çitaku në detaje diskutoi për përkrahjen financiare për
projektet që paraqiten nga komunat për qasje në fondin për ri-integrim
të personave të riatdhesuar. Sipas Çitakut, komuna e Deçanit ka bërë një
punë të shkëlqyer në ri-integrimin e të gjithë personave të riatdhesuar
dhe me pajisjen e qytetarëve me dokumente të gjendjes civile.
Ndërkaq, në takimin me kryetarin e komunës së Malishevës, Isni Kilaj,
Çitaku shpjegoi më në detaje procesin e qasjes në fondin e alokuar për
përkrahje komunave dhe ofroi mbështetje në të gjitha sferat e integrimit
evropian komunës së Malishevë.
Me këtë rast, ministrja Çitaku ndau të njëjtën porosi me të gjithë
kryetarët e komunave se ”procesi i ri-integrimit të qytetarëve të
riatdhesuar nuk është punë e lehtë, dhe në mënyrë që puna të ecën sa më
rrjedhsh nevojitet mbështetje e dyanshme dhe koordinim sa më i mirë
ndërmjet nivelit qendror dhe atij lokal sepse është evidente që barra më
e madhe për ri-integrim bie mbi komunat. Prandaj, mobilizim rreth kësaj
çështje do të na e lehtëson përballjen me këtë sfidë dhe do t’i
kontribuojë mirëqenies së qytetarëve të Kosovës”. /Telegrafi/