Kërkohet më shumë punë nga administrata për mërgimtarët

Me rastin e shtimit të fluksit të ardhjes së mërgimtarëve tanë
në Kosovë, Ministria e Diasporës e Republikës së Kosovës, i bëri edhe
një herë thirrje administratave të kuvendeve komunale, si dhe Ministrisë
së Punëve të Brendshme që të shtojnë kapacitetet e tyre njerëzore dhe
zgjatje të orarit të punës në zyrat e dokumenteve personale.Ministria
e Diasporës e Republikës së Kosovës shprehu besimin se autoritetet
lokale dhe ato qendrore do ta kenë parasysh kohën jo të gjatë të
qëndrimit të mërgimtarëve në Kosovës dhe vonesat eventuale gjatë
procedurave në nxjerrjen e dokumenteve, mund tu shkaktojë atyre
vështirësi në vendet ku jetojnë.
“Ministria e Diasporës, vlerëson se pritjet e mërgimtarëve për tu
pajisur me dokument personal nuk mund të arsyetohen tash kur vite me
radhë kjo çështje ka kërkuar një zgjidhje emergjente. Ministria e
Diasporës e Republikës së Kosovës, po ashtu kërkon që në rastet e
procedurave të përshpejtuara për pajisje me pasaportë, për mërgimtarët
të pezullohet pagesa 100 euro”, thuhet në komunikatë.
Ministria e Diasporës thuhet se ka marrë premtime nga MPB-ja dhe nga
kryetarët e kuvendeve komunale se do të angazhohen në krijimin e
lehtësirave dhe përshpejtimin e procedurave për pajisjen e
bashkatdhetarëve tanë me dokumentacion të nevojshëm. /Telegrafi/