Përjashtimet “diplomatike”

Të gjitha konkurset e hapura nga Ministria e Punëve të Jashtme (MPJ) për pranimin e stafit civil për pozita të ndryshme nëpër konsullata dhe ambasada të Kosovës, u japin mundësi drejtuesve të këtij dikasteri që të manipulojnë me punësimin e tyre.

Kandidatët që aplikojnë për punë, sipas konkurseve të hapura, kanë të drejtë të përzgjedhin pozitën e përshtatshme për ta, përkatësisht llojin e punës që do të bëjnë, por jo edhe vendin ku do të shkojnë, qoftë ai në ndonjërin nga vendet e Bashkimit Evropian, apo në ndonjë vend tjetër.

Në këtë formë, drejtuesit e MPJ-së ia arrijnë që pa asnjë problem të vendosin për “fatin” e të pranuarve në punë, duke ia arritur gjithashtu që nëpër shërbimet konsullore dhe diplomatike t’i dërgojnë militantët e partive të tyre.

Burime të gazetës “Zëri” brenda MPJ-së bëjnë të ditur se drejtuesit e MPJ-së shpesh dështojnë në dërgimin e personave në vendet me të cilat janë të familjarizuar, qoftë nga gjuha zyrtare e atyre shteteve, apo edhe nga kultura e qytetarëve të atij vendi.

Kryetari i Sindikatës së Pavarur të Administratës Publike, Ndue Kalaj, thotë se përzgjedhja e vendit të punës sipas, dëshirës së zyrtarëve të MPJ-së, është tërësisht antiligjore dhe si e tillë vjen në kundërshtim me Ligjin e Punës.

Ai thekson se “modeli” i Ministrisë së punëve të Jashtme për dërgimin e të punësuarve nëpër vende pune, në kundërshtim me “vullnetin”, duhet të ndryshoj sa më parë.

Edhe shoqëria civile është e shqetësuar me këtë formë të punësimit të qytetarëve nëpër vende të ndryshme pune. Drejtori Ekzekutiv i Instituti Ballkanik të Politikave, Seb Bytyçi, thotë se çështja në fjalë jep shumë mundësi për keqpërdorime politike, ndërsa kujton se ka shumë raste kur nëpër vende të ndryshme të botës kanë shkuar militantë të partive në pushtete.

Anëtarët e Komisionit Parlamentar për Punë të Jashtme thonë se nuk janë të informuar për këtë problem. Ata pohojnë se në ditët në vijim do të kërkojnë informata shtesë nga ky dikaster.

Ndërsa, zyrtarët e MPJ-së mohojnë se ka “qëllime të këqija” në raport me aplikuesit. Artab Behrami, këshilltar për media e ministrit të jashtëm, Enver Hoxhaj, thotë se gjithçka bëhet duke iu referuar Udhëzimit Administrativ 3/2009 dhe atij 2009/2 të cilat përcaktojnë procedurat e emërimit të kandidatëve në misione diplomatike dhe shërbime konsullore. /Telegrafi/