Vazhdon dialogu

Në raundin e sotëm të bisedimeve në Bruksel, ndërmjet delegacioneve të Kosovës dhe Serbisë, pritet që të arrihet kompromis për çështjen e vulave të Doganave të Kosovës.

Zyrtarët e Bashkimit Evropian janë shprehur optimistë se do të arrihet ky kompromis, që në vula të jetë mbishkrimi “Doganat e Kosovës”, ngase këto vula i kishte pranuar edhe Misioni i OKB-së në Kosovë, UNMIK-u.

“Radio Evropa e Lirë” ka mësuar se do të diskutohet edhe për implementimin e marrëveshjeve të arritura në muajin qershor. Ndërsa, nuk do të diskutohet për çështjen e strukturave paralele të Serbisë në pjesën veriore të Kosovës, shuarja e të cilave, kohët e fundit, është kërkuar nga disa zyrtarë të lartë të vendeve anëtare të Bashkimit Evropian. /Telegrafi/