Vetëvendosje: Qeveria të japë dorëheqje

Këshilli i Përgjithshëm i Lëvizjes “Vetëvendosje” kërkon dorëheqjen e menjëhershme të Qeverisë së Republikës së Kosovës dhe organizimin e zgjedhjeve të reja të parakohshme.

“Çdo ditë që kjo qeveri qëndron në pushtet, qytetarët e Kosovës humbin pjesë nga pavarësia e shtetit”, thuhet në komunikatën për shtyp të Lëvizjes “Vetëvendosje”.

Sipas tyre, Qeveria e Kosovës ka hyrë në bisedime pa kushte për Serbinë, ku ka pranuar koncesionet që në disa mënyra e reduktojnë shtetësinë e Kosovës.

“Qeveria e Kosovës e ka dobësuar edhe më tej pavarësinë e Republikës së Kosovës, si dhe ka zvogëluar gjasat për ta realizuar ndonjëherë sovranitetin dhe integritetin territorial”.

Me intervenimin në veri dhe zmbrapsjen e menjëhershme, vlerëson “Vetëvendosje”, Qeveria e Kosovës u ka dërguar sinjal të qartë strukturave ilegale në veri të Kosovës që Qeveria e Kosovës nuk është në gjendje t’ju kundërvihet këtyre strukturave edhe kur rrezikohet vendi dhe siguria e qytetarëve dhe e policëve të këtij vendi.

“Në anën tjetër, Kryeministri i Kosovës i ka gënjyer disa herë qytetarët e Kosovës për prezencën e doganierëve dhe forcave speciale në pikat kufitare 1 dhe 31”.

Lëvizja vlerëson se Qeveria e Kosovës e ka neglizhuar dhe e ka injoruar organin më të lartë ligjvënës në vend, Kuvendin e Kosovës. Sipas tyre, koalicioni qeverisës ka shkelur ligjin dhe Kushtetutën gjatë zgjedhjes së Presidentit të Republikës së Kosovës; ka kontrabanduar privatizimin e PTK-së në ligjin për buxhetin; ka gënjyer qytetarët për raportin me FMN-në dhe humbjen e 170 milionë eurove në të hyra sivjet; ka gënjyer deputetët dhe qytetarët mbi çmimet dhe dispozitat e kontratës me konsorciumin Bechtel-Enka si dhe veteranët e luftës për beneficionet në ligjin e propozuar...
“Kjo Qeveri ka ardhur në pushtet me vota të vjedhura dhe proces të manipuluar, që është dokumentuar me raste të shumta që përfshijnë, por nuk kufizohen në vjedhje, kërcënime, blerje votash etj. Prandaj, kjo qeveri është pa legjitimet demokratik”, thuhet ndër të tjera në komunikatë. /Telegrafi/