Infrastruktura ligjore, pengesë e zhvillimit ekonomik

Prishtinë, 13 janar - Përmirësimi i infrastrukturës ligjore dhe krijimi i një ambienti më të mirë për afaristët kosovarë është synim i një programi të prezantuar nga USAID-i. Në një takim me afaristë të ndryshëm kosovarë, Brian Kemple, nga USAID-i, ka paraqitur disa nga mangësitë me të cilat ballafaqohen afaristët vendorë. Sipas tij, objektiv kryesor i këtij programi është ndihma në krijimin e mjedisit më të mirë ligjor për të bërë biznes në Kosovë, si dhe thjeshtësimi i procedurave ligjore, prandaj korpus i punës së këtij programi do të jetë largimi i pengesave për zhvillimin ekonomik. Në këtë takim është thënë se programi për përmirësimin e mjedisit afarist përkrah përfshirjen e rinisë, si pjesëtare më produktive dhe më të angazhuar për një Kosovë stabile, dhe shtimin e rritjes ekonomike, të shtyrë nga krijimi i procedurave lehtësuese për sektorin privat.