Redknappi plaçkitet në Madrid

Londër, 23 janar - Trajneri i skuadrës angleze, Tottenham Hotspur, Harry Redknapp, ka treguar se si është plaçkitur të enjten në Madrid në Spanjë, derisa ishte duke përcjellë një ndeshje futbolli, shkruan "BBC".
Redknapp 63-vjeçar përcolli ndeshjen e kthimit të çerekfinales të Kupës së Spaznjës mes Real Madridit dhe Atletico Madridit.
Ai tregon se dy persona janë ulur në gjunjë para tij dhe kanë nisur t'i tërheqin pantallonat për ta hutuar, ndërsa katër të tjerë i kanë vjedhur para dhe gjëra të tjera me vlerë nga xhepi.
Trajneri anglez thotë se nuk e ka raportuar këtë incident në polici. Ai madje tregon se është dashur të marrë para hua nga ndihmësi i tij, Kevin Bond, për t'u kthyer me taksi në hotel dhe për të darkuar, para se të kthehej në Londër.
"Unë isha duke ecur rreth stadiumit, atmosfera ishte fantastike, kishte tezga të vogla ku shiteshin sheqerka. Mora pak sheqerka për vete dhe për Kevinin. Më pas dy persona u ulën në gjunjë para meje dhe disa të tjerë më kapnin për pantallona. Nuk dija se çfarë po ndodhte. Unë vetëm pashë çelësat që më ranë përtokë. Në fillim mendova se mos dy personat para meje janë të verbër dhe nuk dija se çfarë po bënin. Unë u thashë të më lëshonin rrugën dhe i shtyva, por derisa bëra atë, xhepat u zbrazën. Ishin gjashtë persona që më rrethuan. Më morën të gjitha, paratë, kartelat e bankës dhe gjitha gjërat me vlerë", tregon Redknapp.
Trajneri i Tottenhamit, nuk beson se hajdutët ishin në dijeni se kush ishte ai.
"Ndoshta thjesht i jam dukur më i lehtë. Kanë thënë: ja ku është një i huaj që mund ta plaçkisim".
Real Madridi fitoi ndeshjen e zhvilluar në "Vicente Calderon" me rezultatin 1:0. Me këtë skuadra madrilene siguroi kalimin në gjysmëfinale të Kupës së Spanjës. Redknapp tregon se ai ishte larguar nga stadiumi 15 minuta pa mbaruar ndeshja, pasi u shqetësua nga incidenti. Trajneri anglez ishte në Madrid për të përcjellë sulmuesin uruguaian të Atleticos, Diego Forlan