Vreshtarët e Rahovecit kërcënojnë me protesta

Rahovec, 6 shkurt - Janari kaloi kurse vreshtarët e Rahovecit nuk i morën ende paratë e premtuara të pjesës së dytë nga Qeveria në dorëheqje e Kosovës, për subvencionimin e vreshtarëve që vitin e kaluar nuk arritën të plasonin rrushin e tyre pas refuzimit të dy bodrumeve të rrushit. Ndërsa,zyrtarë të shoqatës “Vreshtari” thonë se nëse Qeveria e Kosovës e vonon pagesën, atëherë vreshtarët do të reagojnë përmes protestave. Nga ana tjetër, zyrtarë të Ministrisë së Bujqësisë këtë vonesa i arsyetojnë me mosmiratimin e buxhetit të Kosovës, raporton KTV. “Nuk ka asgjë të re rreth pagesës për pjesën e dytë prej 50 për qind ndaj vreshtarëve nga Qeveria e Kosovës, sipas marrëveshjes gojore të arritur në shtatorin e vitit të kaluar me Shoqatën e vreshtarëve. Në këtë vit ka qenë vështirë të kontaktohen qeveritarët, për arsye të angazhimeve të tyre në fushatën zgjedhore”, ka thënë Labonit Shulina, kryetar i Shoqatës së vreshtarëve.