Pacollit i ofrohen dy poste në vend të presidentit

As në pakon e dytë të ofertuese për AKR-në, PDK-ja nuk e ka përfshirë Presidencën. Për dallim nga oferta e parë, në këtë të fundit është future një ofertë personale për Behgjet Pacollin.

Kreut të AKR-së i janë ofruar dy funksione në ekzekutiv për t’i ushtruar njëkohësisht, të jetë zëvendëskryeministër dhe ministër i Jashtëm, shkruan Koha Ditore.

Në pakon ofertuese për AKR-në, Thaçi ka futur edhe tri ministri dhe pozitën e kreut të Kuvendit.

Mirëpo zyrtarët e AKR-së e kanë hedhur poshtë menjëherë këtë ofertë. Ata e duan postin e presidentit, një zëvendëskryeministër, gjashtë ministra dhe gjashtë zëvendësministra.
Në të kundërtën preferojnë të mbesin në opozitë.

Nënkryetari i AKR-së Ibrahim Makolli, ka garantuar se më përpara do të qëndrojnë në opozitë sesa të heqin dorë nga presidenti. “Ne insistojmë që të kemi edhe gjashtë zëvendësministra në ministritë qe do t’i merrnim nën drejtim”, ka thënë Makolli.