Për Maqedoninë, Kosova ende në Serbi

Ministria e Punëve të Brendshme (MPB) vazhdon me skandalet e
keqpërdorimit të shtetësisë së Kosovës, edhe pas njohjes së këtij vendi
fqinj. Në dokumentet e udhëtimit të lëshuar për qytetarët e Maqedonisë,
të cilët janë të lindur në Kosovë, vazhdojnë të përdoren kodet
shtetërore serbe për vendbanimet shqiptare të Kosovës.Kështu
një qytetar i Maqedonisë së fundi në agjencinë e lajmeve INA ka shfaqur
shqetësimin dhe skandalin që ka bërë Ministria e Brendshme, duke shlyer
qytetin e lindjes Prishtinën dhe kodin e Republikës së Kosovës, dhe në
vend të saj duke shkruar kodin e Republikës së Serbisë.
“Si duket qëllimisht i bëjnë nëpunësit e policisë këto veprime, që
nuk përkojnë me të vërtetën dhe realitetin. Ata po tregojnë se janë të
ndikuar nga politika serbe, kundër Kosovës dhe assesi nuk pajtohen me të
vërtetën. Edhe fëmija më i vogël, dhe çdokush në botë e di se Prishtina
është kryeqendra e shtetit të Kosovës, mirëpo qëllimisht shlyhet dhe
shteti përdoret si SRB-Srbija”, ka theksuar prindi i fëmijës së lindur
në Prishtinë.
Në pasaportat e reja biometrike në grafën e vendlindjes shënohet
vetëm kodi i shtetit dhe jo qyteti, andaj në të shumtën e rasteve bëhen
skandale të qëllimshme.
Zyrtarë të Qeverisë së Maqedonisë kanë deklaruar se kohë më parë
është shpërndarë një letër qarkore nëpër të gjitha institucionet për të
evituar këto keqpërdorime dhe lëshime të bëra, dhe se, sipas tyre,
rastet e tilla janë individuale, për të cilat duhet të ketë denoncime
dhe të ndërmerren masat sanksionuese. /Telegrafi/