Progres i vogël

Drejtori për Ballkanin Perëndimor në Departamentin për Zgjerim të Komisionit Evropian, Pierre Mirel ka thënë të premten në Prishtinë se në procesin e integrimeve është punuar pak.

Mirel kështu deklaroi të premten gjatë takimit të dytë plenar të Dialogut të Procesit të Stabilizim Asociimit, ku pjesëmarrës ishin edhe drejtues të institucioneve tjera që janë të përfshira në procesin e integrimeve.

“Sa i përket integrimit në BE është shumë e rëndësishme që Qeveria dhe Kuvendi kanë pasur një kornizë kohore dhe mendoj që këtë e kanë bërë vetëm gjatë muajit të kaluar. Andaj nuk do të ishte kurrfarë befasie nëse unë do të përmend se do të kemi fare pak progres për të raportuar në raportin e ardhshëm të progresit, duke marr parasysh që Qeveria s’ka pasur aq shumë kohë për të punuar në reformat e kërkuara e që i kemi diskutuar herën e kaluar”, vlerësoi Mirel.

Drejtori për Ballkanin Perëndimor në Departamentin për Zgjerim të Komisionit Evropian duke folur për sundimin e ligjit theksoi se ka pasur progres në kornizën ligjore, por zbatimi i ligjeve mbetet ende sfidë serioze, pasi rreth 45 për qind e tyre mbeten të pazbatuara.

Mirëpo, për kryeministrin e vendit, Hashim Thaçi, Qeveria do të vazhdojë angazhimin e saj në procesin e integrimit të vendit në Bashkimin Evropian, pasi që kjo rruga më e shpejtë për zhvillim të qëndrueshëm ekonomik dhe jetë më të mirë.

“Ne do të vazhdojmë zbatimin e agjendës evropiane, pa lëvizur asnjë milimetër prapa në reformimin dhe avancimin e shtetit të Kosovës me një qëllim të vetëm, arritjen e standardeve evropiane në të gjitha fushat e qeverisjes dhe përmirësimin e jetës së qytetarëve... Që nga takimi i fundit i PSA-së Kosovën e kanë përshkuar zhvillime të ndryshme politike të cilat, përkundër vështirësive për t’i tejkaluar përçojnë një mesazh të fuqishëm të fuqizimit të demokracisë në vendin tonë”, theksoi Thaçi.

Kryeministri duke folur për sundimin e ligjit dhe luftën kundër korrupsionit ka thënë se institucionet e vendit janë duke punuar me përkushtim të madh në këtë drejtim. /Telegrafi/