Lobo Sosa: Shumë shtete tjera do ta njohin Kosovën

Hondurasi do të vazhdojë t’i përforcojë marrëdhëniet me Kosovën dhe shumë shtete tjera do ta njohin pavarësinë e Kosovës- ka deklaruar presidenti i Hondurasit, Porfirio Lobo Sosa, në një takim me kryetarin e komunës së Prishtinës dhe kreun e LDK-së, Isa Mustafa.

Lobo Sosa e ka përgëzuar Mustafën për punët e kryera në kryeqytet duke thënë se kjo i kontribuon jetës më të mirë për qytetarët, ndërsa ka treguar se edhe kryeqyteti i vendit të tij ballafaqohet me probleme të ngjashme të Prishtinës.

Kryetari Mustafa ka shprehur falënderimet për njohjen e shtetësisë së Kosovës nga Hondurasi dhe për angazhimin e presidentit të këtij vendi në procesin e njohjeve. Në takim, po ashtu, është biseduar edhe për mundësitë e bashkëpunimit mes kryeqyteteve të dy vendeve. /Telegrafi/