Zhbllokohen rrugët në veri

E plotësuar- Rreth 50 automjete të Policisë së EULEX-it dhe njësiteve të KFOR-it janë kthyer në jug të Mitrovicës. Pas largimit të tyre, rreth orës 12, serbët kanë zhbllokuar rrugët e veriut.

Policia e EULEX-it me mbështetjen e KFOR-it ka kryer hetimet në vendin ku është vrarë polici kosovar i njësiteve ROSU. Para aksionit, janë larguar automjetet të cilat serbët i kanë vendosur si pengesa në një pjesë të rrugës.

Siç raporton “Tanjug”, në Zupç në rrugën magjistrale qëndrojnë serbët lokal dhe ushtarët e KFOR-it.

KFOR-i gjendet edhe në rrugët dytësore të këtij rajoni.

Ndryshe, në Zubin Potok ishte zhvilluar një aksion për kapjen e vrasësit të policit të Kosovës, Enver Zymberit, që ndodhi më 26 korrik.

Zëdhënësja e EULEX-it, Irina Gudelevic deklaroi se aksioni ka filluar sot herët në mëngjes dhe se rruga ndërmjet Zubin Potokut dhe Zupçit do të jetë përkohësisht e mbyllur për qarkullim.

“Po vazhdojmë hetimin në rrugën ndërmjet Zubin Potokut dhe Zupçit. Ky hetim i ‘vendit të krimit’ lidhet me vrasjen e pjesëtarit të Policisë Speciale të Kosovës, ROSU, më 26 korrik”, citon radio KiM zëdhënësen Gudelevic, transmeton Koha.

Ajo citohet të ketë shtuar se derisa zgjat aksioni të gjithë këshillohen të përdorin drejtimet rrugore alternative.

Aksioni i EULEX-it po mbështetet nga KFOR-i. Hetimet rreth vrasjes së policit të Kosovës po i zhvillojnë bashkërisht EULEX-i dhe Policia e Kosovës. /Telegrafi/