Dështon tentativa e Koresë Veriore për të mashtruar FIFA-n

Trajneri i Koresë së Veriut, Kim Jong-Hun, kishte planifikuar që në Botërorin 2010 të marrë vetëm dy portierë. Për këtë arsye ai vendosi që sulmuesin Kim Myong-Won ta regjistrojë si portier për të pasur më shumë forcë ofensive. Por veprimi i Kimit nuk doli të jetë i menduar mirë. FIFA së fundi ia ka bërë me dije Koresë së Veriut se sulmuesin që e ka regjistruar si portier mund ta aktivizojë vetëm në portë, si portier.
Koreja e Veriut ka dorëzuar listën definitive prej 23 futbollistëve që do të luajnë në "Afrikë të Jugut 2010". Nuk ka të drejtë të bëjë ndryshime të reja në listë. Lista mund të ndryshohet vetëm në rast se ndonjëri nga futbollistët lëndohet seriozisht.
"Çdo federatë është e obliguar t'ia dorëzojë FIFA-s listën finale me hiç më shumë se 23 futbollistë (tre prej tyre duhet të jenë portierë)", thuhet në Rregulloren e FIFA-s për kampionate botërore. Koreja e Veriut gjendet për herë të dytë në një kampionat botëror. Debutoi në Botëror në vitin 1966 në Angli. Koreanoveriorët gjenden në grup me përfaqësuese, si Brazili, Portugalia e Bregu i Fildishtë. "Listat që skuadrat ia kanë dorëzuar FIFA-s deri më 1 qershor të vitit 2010 janë finale dhe nuk mund të ndryshohen më. Në listën finale nuk mund të ketë më shumë se 23 futbollistë, ndërsa tre prej tyre duhet të jenë portierë. Përjashtimi i vetëm është në rast të një lëndimi serioz të ndonjë futbollisti, që mund të zëvendësohet më pas deri në 24 orë para ndeshjes së parë. Tre të regjistruar si portierë, mund të aktivizohen vetëm si portierë në Kampionat Botëror dhe nuk mund të luajnë në pozita të tjera. Kështu që lojtari Kim Myong-Won nuk do të ketë të drejtë të luajë si sulmues, nëse është regjistruar si portier", është deklaruar FIFA për "Soccernet".