Incident i armatosur në Radushë, 4 të vdekur

Incident i armatosur në Radushë, 4 të vdekur

Katër të vdekur dhe disa të plagosur është bilanci i incidentit të armatosur që gjatë natës ka ndodhur në afërsi të fshatit Radushë të Shkupit, mëson Alsat-M.
Tre nga viktimat janë identifikuar, ndërsa është duke u bërë identifikimi i viktimës së katërt. Bëhet për një person nga fshati Gërçec, një nga Prishtina dhe një nga fshati Merovë.

Incidenti ka ndodhur pasi grupi i armatosur ka qenë duke bartur armë në kufirin midis Maqedonisë dhe Kosovës dhe ka hapur zjarr ndaj policisë.

Vendi i ngjarjes është i bllokuar nga forcat policore, ndërsa mbi të fluturojnë helikopterë.

Banorët lokalë thonë se kanë dëgjuar të shtëna armësh nga mesnata deri në orën 3 të mëngjesit.

Agjencitë e lajmeve transmetojnë zëdhënësin e policisë, Ivo Kotevski, të ketë thënë se katër personat janë vrarë në rrethinën e fshatit Radushë, kur policia i pengoi gjatë përpjekjes për të trafikuar armë përtej kufirit me Kosovën.

Kotevski ka thënë se katër njerëzit ishin duke udhëtuar me një furgon, në të cilin është gjetur sasi e madhe armatimi dhe eksplozivi.

Ndërkaq, zëdhënësi i Policisë së Kosovës Baki Kelani, i tha Radios Evropa e Lirë se nuk kanë asnjë informacion se mund të ketë pasur incidente në pjesën kosovare të kufirit me Maqedoninë. /alsat-m/rel