Sejdiu, qytetar nderi i Lilongwes

Republika e Malawit ka rikonfirmuar përkrahjen e fuqishme për popullin dhe institucionet e Kosovës me një pritje madhështore që ky vend i bëri Fatmir Sejdiu, i cili me ftesë të homologut të tij Bingu Wa Mutharika, të enjten ka nisur vizitën shtetërore në këtë vend.
Presidentit Sejdiu iu bë një pritje e jashtëzakonshme Aeroportin Ndërkombëtar Kamuzu nga institucionet më të larta shtetërore të Malawit, si dhe nga mijëra qytetarë të këtij vendi, ndërsa në krye të delegacionit mikpritës ishte vetë presidenti Mutharika. Në këtë frymë solemniteti e miqësie ka kaluar edhe ceremonia e veçantë e organizuar nga Këshilli i Qytetit Lilongwe, në të cilën Presidentit Sejdiu në mënyrë simbolike iu dorëzua çmimi “Qytetar Nderi”, si dhe iu dha “Çelësi i Qytetit”.

“Unë jam këtu për të përcjellë falënderimet e qytetarëve dhe të institucioneve të Republikës së Kosovës për vendimin e marrë nga Ju muaj më parë për ta njohur Republikën e Kosovës. Jam i impresionuar me pritjen e jashtëzakonshme që më keni bërë mua dhe përfaqësuesve të tjerë të vendit tim, që janë të pranishëm sot këtu. Po ashtu, është nder i veçantë për mua ky vendim që ka marrë qyteti juaj”, tha mes tjerash Sejdiu duke pranuar mirënjohjen

Gjatë vizitës së tij të parë shtetërore në kontinentin afrikan, Sejdiu do të ketë një agjendë të ngjeshur aktivitetesh. Veç takimit me presidentin Mutharika, ai të premten do të paraqesë një fjalim në Asamblenë Kombëtare të Malawit, si dhe do të takohet me përfaqësues të tjerë të lartë të këtij vendi.

Presidentin Sejdiu në këtë vizitë po e shoqërojnë edhe ministri i Punëve të Jashtme, Skënder Hyseni dhe ambasadori i Kosovës në Mbretërinë e Bashkuar, Muhamet Hamiti.