Kosova e Shqipëria, masa të përbashkëta kundër etheve hemorragjike

Kosova e Shqipëria, masa të përbashkëta kundër etheve hemorragjike


Ekspertë të Institutit Kombëtar të Shëndetësisë Publike
(IKSHP) të Kosovës në një takim në Kukës me zyrtarë të Ministrisë së
Shëndetësisë të Shqipërisë dhe më përfaqësues të Institutit të Shëndetit
Publik të Tiranës shkëmbyen përvojat në luftimin e etheve hemorragjike.

Në
njoftimin e Ministrisë së Shëndetësisë bëhet e ditur se temë e këtij
takimi ka qenë diskutimi i përvojave kosovare në ballafaqim me ethet
hemorragjike si dhe ndihma që në këtë aspekt mund të jap Kosova për
Shqipërinë.
Në këto takime është biseduar edhe për ndërmarrjen e masave të
përbashkëta në luftimin e etheve hemorragjike, duke pasur parasysh
faktin se rastet me ethet hemorragjike, përveç Kosovës, sivjet kanë
përfshirë edhe veriun e Shqipërisë, gjegjësisht janë paraqitur në Golaj
të Hasit të Shqipërisë, duke shkaktuar edhe një viktimë.
Në Kosovë, ndërkaq, sivjet rastet e para të paraqitjes së etheve
hemorragjike janë lajmëruar në fillim të marsit në komunën e Malishevës,
ndërsa janë shënuar edhe 4 viktima prej tyre: dy nga komuna e
Malishevës, një nga komuna e Gjakovës dhe një nga komuna e Rahovecit.