Rrymë nga patatja

Shkencëtarët nga Jerusalemi kanë zhvilluar një bateri të thjeshtë, të fortë dhe të lirë nga patatja për shtetet në zhvillim.
Kompania izraelite Yissum Research Development Company, në pronësi të “Hebrew University” nga Jerusalemi, ka paraqitur bateri të lira të thjeshta për shtetet në zhvillim. Materiali kryesor për përpunimin e këtyre baterive është patatja e thjeshtë, e fuqia e thjeshtësia e tyre do të duhej të ishte me dobi të madhe për rajonet me infrastrukturë më pak të zhvilluar elektrike.

Profesori Haim D. Rabinowitch dhe shkencëtari Alex Goldberg në bashkëpunim me profesorin Boris Rubinsky nga “Berkeley” i Kalifornisë, kanë punuar në hulumtimin e proceseve elektrike në substanca të gjalla për zbatime të llojllojshme. Ata kanë vërejtur se me shfrytëzimin e elektrodave nga zinku dhe bakri munden të krijojnë një bateri nga patatja, fuqia e së cilës rritet edhe deri në 10 herë nëse ajo patate zihet para përdorimit.

Sipas tyre, një bateri e tillë mund të zgjasë me ditë e javë, e është deri në 50 herë më e lirë se bateritë komerciale D me voltazh prej 1.5 V.

Puna e këtyre shkencëtarëve është publikuar në numrin e muajit qershor të revistës “Journal of Renewable and Sustainable Energy” si dhe në botimin javor të revistës prestigjioze “Nature”.