Heroi i Ganës ishte afër largimit nga Përfaqësuesja

Heroi i Ganës ishte afër largimit nga Përfaqësuesja






Rustenburg, 22 qershor - Para dy vjetësh Asamoah Gyan, ishte afër t'i thoshte lamtumirë Përfaqësueses së Ganës, për shkak të rrjedhave brenda ekipit, por bashkëlojtarët ia ndryshuan mendjen. Dhe mirë bënë. Tash në Afrikën e Jugut, me golat e tij është afër të ndihmojë Ganës drejt një suksesi tjetër të madh - të sigurojë kualifikimin në rrethin e dytë të kampionatit botëror "Afrika e Jugut 2010".

Gyan 24-vjeçar ka shënuar të dy golat e ekipit të tij në këtë Botëror, të fundit nga penalltia në barazimin kundër Australisë (1:1). Ai shënoi edhe golin e fitores kundër Serbisë (1:0) dhe përgjithësi golat e tij kanë vlerën e katër pikëve.
Ndeshjen e fundit në grup dhe vendimtare, Gana e luan kundër Gjermanisë.

Tash gëzimi i Asamoah Gyan i njohur si "Asamoah Dance" për shkak të mënyrës se si feston golat nuk është aq i madh sa ishte dëshpërimi në vitin 2008, kur së bashku me vëllanë e tij më të vjetër Baffour Gyan kërcënuan me largim nga ekipi, por insistimi i bashkëlojtarëve bëri që ata të ndërrojnë mendjen.

"Ky Botëror mund të jetë pikë kthimi për mua. Megjithatë, nuk do ta ngarkojë kokën me këto gjëra, sepse Ganës i duhet fitorja dhe kualifikimi në rrethin e dytë", tha Asamoah Gyan.

Gyan kishte një rol të tillë edhe në Kampionatin Botëror "Gjermania 2006" ku pati shënuar golin më të shpejtë. Atëbotë ai pati shënuar pas vetëm 68 sekondash lojë kundër Çekisë. Gana u kualifikua në rrethin e dytë, por Gyan u përjashtua nga dueli me Brazilin për shkak të simulimit.

Asamoah nuk ka pasur fillim të mirë te ekipi francez Rennes pasi përcillej vazhdimisht nga lëndimet. Mirëpo, te Gana ka një tregim tjetër për të. Vitin e shkuar e dërgoi në finalen e Kupës së Afrikës dhe shënoi tre nga katër golat gjatë këtij turneu.

Në pjesën e dytë të edicionit në Ligue 1, ai ka shënuar 13 gola dhe kështu ka bërë me dije se do të jetë ndër më të rëndësishmit te Gana.

"Lëndimet jo vetëm që kanë ndikim në paraqitje, por edhe në vetëbesim. Në fillim pata kohë të vështira. Por, pastaj gjërat u rregulluan dhe edicionin e përfundova në mënyrën më të mirë ne Francë, tash po tregohem i suksesshëm edhe te Gana", tha ai. Trajneri i mëparshëm i Ganës, Claude Le Roy e ka përshkruar Gyanin si miksim mes Didier Drogbës dhe Samuel Eto'os.

"Nuk besoj në një gjë të tillë. Unë jam Gyan dhe do të jem kështu gjithmonë".