Vizat, një Zot e di kur!

Eurodeputetja Doris Pack e cila po qëndron për një vizitë në Kosovë nuk dha ndonjë përgjigje se kur qytetarët e Kosovës do të mund të udhëtojnë lirshëm në Evropë.
Pas takimit me ushtruesin e detyrës së presidentit, Jakup Krasniqi, eurodeputetja Pack tha se shpreson që Kosova, të paktën do ta marrë Udhërrëfyesin për liberalizimin e vizave, siç ka ndodhur edhe me vendet tjera të rajonit.

Ajo vlerësoi se procesi i liberalizimit mund të vonohet, për shkak të pesë vendeve evropiane që nuk e kanë njohur ende Kosovën, mirëpo premtoi se Parlamenti Evropian do të punojë që t’i bind këto vende që ta njohin Kosovën, në mënyrë që të shkurtohet procesi i integrimit.

“E di që të gjithë janë të interesuar të dinë rreth procesit të liberalizimit të vizave, por nuk mund të ju japë përgjigje. Shpresoj shumë, se ju do ta merrni udhërrëfyesin që nevojitet, pasi të gjithë tashmë e kanë marrë atë. Ju e dini se vendi i ri ende nuk është njohur nga pesë vendet e Bashkimit Evropian, dhe kjo merr pak më shumë kohë, sidoqoftë shpresoj shumë se kjo kohë do të shkurtohet dhe Parlamenti Evropian do të ndihmojë në këtë drejtim”, tha Pak pas takimit me ushtruesin e detyrës së presidentit të Kosovës, Jakup Krasniqi.

Ndërkaq, Krasniqi duke folur për zhvillimet e fundit politike në Kosovë, pas rënies së Qeverisë dhe shpërbërjes së Parlamentit të Republikës, tha se janë zhvillime normale në një proces demokratik.

Ndryshe, eurodeputetja Doris Pack tha se thirrja e Beogradit për serbët e Kosovës që të marrin pjesë në votime është sinjali i parë për ndryshime.

Pack është takuar edhe me kryeministrin në dorëheqje Hashim Thaçi. /