Kurti për konfiskim të pasurisë së fituar paligjshëm

Kaçanik, 4 nëntor - Lideri i "Vetëvendosjes", Albin Kurti ka deklaruar në Kaçanik se kjo lëvizje nuk është kundër institucioneve ndërkombëtare të instaluara në Kosovë, por është për partneritet me to.
"Nuk jemi kundër faktorëve ndërkombëtarë, nuk jemi kundër bashkësisë ndërkombëtare. Nuk duam të jemi armiq me ta, por nuk duam të jemi as servilë ndaj tyre. Besojmë se as armiqësia e as serviliteti nuk janë zgjidhje. Zgjidhje është partneriteti, por partneriteti nënkupton reciprocitet e barazi", ka theksuar Kurti, në debatin e organizuar me studentë kaçanikas, të enjten pasdite.
Ai e ka shfrytëzuar takimin me studentë për të shpalosur edhe aspekte të programit elektoral të "Vetëvendosjes", ndërsa ka premtuar luftë të ashpër kundër korrupsionit.
"Kosova është një vend tepër i varfër, me buxhet tepër të vogël, që ta ketë një korrupsion kaq të lartë. Kosova ka tepër pak, ndërsa vidhet tepër shumë", është shprehur Kurti.
Ai ka nënvizuar se "Vetëvendosje" angazhohet edhe për konfiskim të pasurisë së fituar në mënyrë të paligjshme. Kosovën e vitit 2010 ai e ka cilësuar vend pa demokraci të mirëfilltë.